Job 23

Mĩario ya Ayubu

1Ningĩ Ayubu agĩcookia atĩrĩ:

2 ^a“O na ũmũthĩ gũteta gwakwa no kũrũrũ;
guoko gwake nĩkũnditũhĩire o na ngĩcaayaga ũguo.
3Naarĩ korwo nĩnjũũĩ kũrĩa ingĩmuona;
Naarĩ korwo no hote gũthiĩ kũrĩa aikaraga!
4Ingĩĩyarĩrĩria harĩ we,
njiyũrie kanua gakwa ihooto.
5No nyende kũmenya ũrĩa angĩĩnjookeria,
ndĩcũũranie ũrĩa angĩnjĩĩra.
6 ^bNo anjũkĩrĩre na ũhoti wake mũnene?
Aca, ndangĩhatĩrĩria na thitango.
7 ^cHau-rĩ, mũndũ mũrũngĩrĩru no atware ciira wake mbere yake,
na niĩ njohorithio kuuma kũrĩ mũnjiirithia nginya tene.

8“No rĩrĩ, ingĩthiĩ mwena wa irathĩro, we ndarĩ kuo;
ingĩthiĩ mwena wa ithũĩro, ndiramuona.
9Hĩndĩ ĩrĩa arĩ wĩra-inĩ mwena wa gathigathini, ndimuonaga;
rĩrĩa athiĩ mwena wa gũthini, ndimuonaga o na hanini.
10 ^dNowe-rĩ, nĩooĩ njĩra ĩrĩa ngeragĩra;
aarĩkia kũngeria, ngoima haana o ta thahabu.
11 ^eMagũrũ makwa moimĩte makinya make thuutha;
nũmagĩrĩra njĩra yake itekwahũka na mwena.
12 ^fNiĩ nditiganĩirie maathani ma mĩromo yake;
njĩkĩrĩire ciugo cia kanua gake gũkĩra irio ciakwa cia o mũthenya.

13“No rĩrĩ, arũgamaga arĩ o wiki; nũũ ũngĩhota kũregana nake?
Ekaga o ũrĩa ekwenda.
14 ^gAhingagia ũndũ ũrĩa anduĩrĩire,
na arĩ o na mĩbango mĩingĩ ta ĩyo anjigĩire.
15 ^hKĩu nĩkĩo gĩtũmĩte nyiitwo nĩ kĩmako ndĩ mbere yake;
ndeciiria maũndũ macio mothe-rĩ, ngamwĩtigĩra.
16 ⁱMũrungu nĩatũmĩte ngoro yakwa yũrwo nĩ hinya;
ũcio Mwene-Hinya-Wothe nĩatũmĩte nyiitwo nĩ guoya.
17 ^jNo rĩrĩ, ndikirĩtio nĩ nduma,
ĩĩ nduma ĩyo ndumanu ĩhumbĩrĩte ũthiũ wakwa.